មន្ទីរពេទ្យជាតិតេជោសន្តិភាពដែលជាមន្ទីរពេទ្យជាតិដ៏ធំនិងទំនើបនៅភ្នំពេញបានសម្ពោធដាក់ប្រើប្រាស់ជាផ្លូវការនៅថ្ងៃនេះក្រោមអធិបតីរបស់លោកនាយករដ្ឋមន្ត្រី ហ៊ុន ម៉ាណែត បន្ទាប់ពីមន្ទីរពេទ្យមួយនេះបានបើកដំណើរការសាកល្បងផ្ដល់សេវាព្យាបាលជូនអ្នកជំងឺកាលពីកំលុងខែមេសា កន្លងទៅ។
មន្ទីរពេទ្យជាតិដ៏ធំមួយនេះត្រូវបានសាងសង់លើផ្ទៃដីទំហំ៧.៥៨ហិកតាស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ ក្រោមគំនិតផ្ដួចផ្ដើមរបស់អតីតនាយករដ្ឋមន្ត្រី ហ៊ុន សែន នៅក្នុងកំលុងពេលដែលកម្ពុជាផ្ទុះការឆ្លងជំងឺកូវីដ-១៩ ហើយគ្មានមន្ទីរពេទ្យគ្រប់គ្រាន់សម្រាប់ទទួលការព្យាបាលអ្នកជំងឺ។
មន្ទីរពេទ្យជាតិតេជោសន្តិភាពមានសមត្ថភាពទទួលព្យាបាលអ្នកជំងឺទូទៅប្រមាណមួយម៉ឺននាក់។
លោក សួន សាមិត្ត ប្រធានមន្ទីរពេទ្យជាតិតេជោសន្តិភាព បានប្រាប់ខ្មែរថាមស៍ពីម្សិលមិញថា មន្ទីរពេទ្យជាតិតេជោសន្តិភាពត្រូវបានកសាងឡើងជាមួយនឹងការបំពាក់បំពាក់សម្ភារៈនិងបរិក្ខារវេជ្ជសាស្ត្រទំនើបចុងក្រោយស្របតាមលក្ខណៈស្តង់ដារសម្រាប់បម្រើការពិនិត្យនិងព្យាបាលជូនប្រជាជន។
លោកបន្តថា ដោយសារតែមន្ទីរពេទ្យទើបតែបង្កើតឡើង ដូច្នេះការបំពាក់សម្ភារៈនិងបរិក្ខារវេជ្ជសាស្ត្រទំនើបចុងក្រោយនៅមិនទាន់គ្រប់គ្រាន់នៅឡើយទេ ប៉ុន្តែខាងមន្ទីរពេទ្យនឹងបំពាក់បន្ថែមនៅពេលក្រោយទៀត។
លោកបាននិយាយបន្តឱ្យដឹងថា៖ «យើងមានបុគ្គលិកសុខាភិបាលគ្រប់គ្រាន់សម្រាប់បម្រើការនាពេលបច្ចុប្បន្ន ប៉ុន្តែនៅពេលដែលយើងពង្រីកវិសាលភាពព្យាយបាល គឺយើងត្រូវបុគ្គលិកបន្ថែមទៀត»។
លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានបញ្ជាក់ថា តាមដែលលោកដឹងអំពីមន្ទីរពេទ្យជាតិតេជោសន្តិភាពបំពាក់ដោយសម្ភារៈនិងបរិក្ខារវេជ្ជសាស្ត្រទំនើបខ្លាំងណាស់ ពោលគឺទំនើបមិនចាញ់នឹងមន្ទីរពេទ្យជាតិដទៃទេ។
លោកនិយាយថា ភាពទំនើបរបស់វា គឺប្រហាក់ប្រហែលឬអាចទំនើបជាងមន្ទីរពេទ្យកាល់ម៉ែត្រនិងមន្ទីរពេទ្យមិត្តភាពខ្មែរ-សូវៀត។ មន្ទីរពេទ្យនេះសម្រាប់ព្យាបាលជំងឺទូទៅ ដែលមានសមត្ថភាពទទួលអ្នកជំងឺប្រមាណមួយម៉ឺនគ្រែ។
លោកបានមានប្រសាសន៍ថា៖ «តាមផែនការ មន្ទីរពេទ្យនេះបង្កើតឡើងដើម្បីត្រៀមឆ្លើយតបនឹងជំងឺរាតត្បាតផ្សេងៗ»។
លោក ហ៊ុន សែន បានថ្លែងក្នុងដំណើរការពិនិត្យការសាងសង់មន្ទីរពេទ្យជាតិតេជោសន្តិភាពកាលពីដើមឆ្នាំថា ការសាងសង់នោះជាការសង់បែបទំនើប ដែលអគារបានផ្ដល់បរិយាកាសល្អសម្រាប់ដល់អ្នកជំងឺ។
បន្ថែមលើនេះ អគារបានបំពាប់សព្វគ្រប់តាមរបៀបទាន់សម័យ ហើយផ្ដល់ការពិគ្រោះជាមួយជំងឺតាមអនឡាញផងដែរ។
លោកបន្តថា វាជាមន្ទីរពេទ្យទំនើបនិងធំជាងគេនៅកម្ពុជា ដែលគ្រែប្រមាណមួយម៉ឺនសម្រាប់អ្នកជំងឺសម្រាកព្យាបាល សម្រាប់គ្រូពេទ្យប្រចាំការ និងសម្រាប់បុគ្គលិកស្នាក់នៅ។ មន្ទីរពេទ្យនេះមានអគារសង្គ្រោះបន្ទាន់និងការព្យាបាល មន្ទីរពិសោធ អគាររដ្ឋបាល អគារបច្ចេកទេស អគារផ្គត់ផ្គង់ កន្លែងផ្ដល់ព័ត៌មាន កន្លែងមូលនិធិសមធម៌និងបេឡាសន្តិសុខសង្គម ឱសថស្ថាន ចំណត់យានយន្ត និងចំណតឧទ្ធម្ភាគចក្រនៅលើដំបូលអគារ។
មន្ទីរពេទ្យជាតិតេជោសន្ដិភាពនេះកសាងដោយក្រុមហ៊ុនស៊ីជេអុីស៊ី (CJEC) សហការជាមួយសាលារាជធានីភ្នំពេញ ក្រោមគម្រោងថវិការបស់រដ្ឋាភិបាល។ មន្ទីរពេទ្យជាតិតេជោសន្ដិភាពនេះត្រូវបានរដ្ឋបាលរាជធានីភ្នំពេញបើកការដ្ឋានសាងសង់កាលពីថ្ងៃទី១៤ ខែកុម្ភៈ ឆ្នាំ២០២២។
លោកវេជ្ជបណ្ឌិត គួច ម៉េងលី អ្នកឯកទេសសុខភាពសាធារណៈដ៏ល្បី បានធ្លាប់និយាយថា ដើម្បីមន្ទីរពេទ្យដ៏ធំនេះដំណើរដោយជោគជ័យ គឺទាមទារការបណ្ដុះបណ្ដាលបុគ្គលិកសុខាភិបាលជាច្រើនបន្ថែមទៀត ជាពិសេសគួរមានវេជ្ជបណ្ឌិតជំនាញមកបរទេសក្នុងការសហការគ្នា ដើម្បីផ្ដល់នូវបច្ចេកទេសផ្សេងៗក្នុងការព្យាបាលជាមួយនឹងការផ្ដល់ភាពកក់ក្ដៅដល់ប្រជាពលរដ្ឋដែលមកទទួលយកសេវាព្យាបាលពីមន្ទីរពេទ្យ។
លោកបន្តថា នេះជាឱកាសមួយដ៏ល្អមួយក្នុងការផ្ដល់ការងារដល់គ្រូពេទ្យ និងការផ្ដល់ការហ្វឹកហាត់ជំនាញបច្ចេកទេសដល់និស្សិតពេទ្យផ្សេងទៀត ព្រោះកន្លងមកនៅតាមមន្ទីរពេទ្យមួយចំនួនមានការខ្វះបុគ្គលិកសុខាភិបាលដូចជានៅមន្ទីរពេទ្យ។
លោកបន្ថែមថា៖ «ការបង្កើតមន្ទីរពេទ្យនីមួយៗ គឺត្រូវការឧបករណ៍បច្ចេកទេសជាច្រើន ដើម្បីរៀបចំដំណើរការមន្ទីរពេទ្យ ប៉ុន្តែការបង្កើតមន្ទីរពេទ្យតេជោសន្ដិភាព គឺកើតឡើងនៅពេលយើងជួបប្រទះនូវជំងឺឆ្លង។
នេះជាការល្អក្នុងការត្រៀមសម្រាប់ថ្ងៃមុខចំពោះជំងឺឆ្លងផ្សេងៗផ្ទុះឡើងដូចជាជំងឺកូវីដ-១៩»។
លោកបន្ថែមទៀត៖ «នៅថ្ងៃអនាគតវាលែងជាបញ្ហាទៀតហើយពេលយើងមានមន្ទីរពេទ្យទំនើបបែបនេះធ្វើឱ្យពលរដ្ឋមានទំនុកទុកចិត្តខ្ពស់ក្នុងការទប់ស្កាត់នូវជំងឺទាំងឡាយ»៕
Phone Number: 087781119
https://hospital-10763.business.site/?utm_source=gmb&utm_medium=referral
https://maps.app.goo.gl/kMog1EVHavwsDjnf7
